КIюрххил чаклил чIун

– Гьунттивагу ччяни изан шайссания! - будильникрахгу уруглай шанавух увкуну бур Муслимлул. 

Мукунсса пикрирдащал шанан ивкIун ур. ДуркIун дур кIюрх, тIивтIусса чIавахьурттувух ахрния баллай бивкIун бур «акбар» тIисса будуннал чIу. Амма Муслим мукун куртIну шанай ивкIун урхха, мизитравасса азандалул чIунил чантI учин къаувну ур. Цаппара хIаллава зун диркIун дур будильник. Ганивасса музыкалул чIунил Муслим чантI учин увну ур.

Шанавух виргъандалува кагу личин дурну, лерщун телефонгу, будильникрахь миннат буллалисса куна: «ЦIана изанна, ххюра минутIрава…» - увкуну, махъунай кIараллийн агьну, шанан ивкIун ур.

Ларгун дур ялагу чIун. Яру тIивтIукун, ванан ккавккун бур чани щяв дагьавай душиву. Муссят тIанкI куну ивзун, анаварну иссавугу дурну, чак буллан ивкIун ур.

Укунсса иш Муслимлущал чIявуну шайсса бивкIун бур, мунияту цаятува хъинну рязи акъа ивкIун ур. Ахиргу цала дустурахь бувсун бур цукунчIав шанущал лаян бюхълай акъашиву.

– Ачу кIюрххил чаклил чIун дуркIукун, жу вичIан телефондалувух оьвтIуннуча, - куну бур МахIмудлул, – жущал гъалгъа тIий унува шанугу ххиянтIиссар.

Муслим рязи хьуну, дурну дур мукунсса икьрал. Гьунттимур кьинигу азандалул ва будильникрал чантI учин къаувсса оьрчI нахIуну шанай унува, оьвтIисса телефондалул чIу бавну бур. Хъап куну гьаз дурну телефон «Алло» куну бур. Га МахIмуд ивкIун ур. Тяхъасса чIуний цащала ихтилат буллалисса дуснахь Муслимлул бувчIу-къабувчIу бувну: «На изавай ура, излай ура, ивзун ура…» – увкуну, бакI махъуннай кIараллий дирхьуну дур. Амма телефон ялагу оьвтIун диркIун дур:

– Муслим, на вичIан оьвтIунна, ина мяйжаннугу ивзшиву тасттикь хьуннин. Акбар увкунни, изу лавай, шанашалай! – увкуну бур МахIмудлул.

– Агьа, изавай ура, - гьагьругу бигьлай куну бур Муслимлул. – Вин барчаллагь, на чантI увкунна…

– Ачу-ачу, изу лавай, жулами циняв бивзуннича! ХIакьину цими дарс дуссарив дакIний бурив? Ина спортзалданувун учIаннав? – МахIмуд ивкIун ур ихтилат лахъи буллай Муслимлул шану ххиян буваншиврул.

Дуснащал гъалгъа тIиссаксса хIаллай Муслимлун хIисав хьуну бур мяйжаннугу шану ххиллай бушиву. Цала хIиллалул кумаг хьушиврия рязисса оьрчI анаварну чаклин иссун лавгун ур. Му куццуй бювхъуну бур цила чIумал кIюрххил чак буван.

Мунияр махъ дустурал телефондалувух оьвтIий, куннал ку бизан бувайсса аьдат хьуну дур. Цаппара хIаллава гай яхъанахъсса махIлалий цIусса мизит бувну, оьрчIругу гьарца кIюрххил чаклийн гивун занази хьуну бур.

Му куццуй, дустурал кумаграйну, Муслим аьдат хьуну ур мизитрава «акбар» тIий байбишайхту шания изаван. Ванан бувчIуну бур гьарца ишираву дустуращал маслихIат ккаккан, куннал чIарав ку бацIаван аьркиншиву.