Чаклил чIун

Ахттайн чак

Ахттайн чIумал чак бува куну ялув баврил хIикматшиву тIурча, Идавсил [саллаллагьу аьлайгьи ва саллям] увкуну бур: «Гьарца кьини баргъ ссавнил дянивун бивну завал хьусса чIумал гьарца Куллу Шайърал Аллагьнаха хIамд дувайссар, тасбихI дувайссар. Му ссятраву Аллагьу Тааьланал ттуяту салаватгу дутайссар. Му ссятраву гьарца кьини дужжагьгу кIири бувайссар. Кьиямасса кьини халкь дужжагьравун бакьинтIисса ссятгу мури. Мунияту, Аллагьу Тааьланал му ссятраву ахттайн чак баву ялув бувссар ттуйгу, ттул умматиннайгу. Му ссятраву чак бувайманал чурх Аллагьу Тааьланал цIарая мурахас бувантIиссар».

Ахттакьун чак

Ахттакьун чIумал чак ялув баву тIурча, му ссятраву Адам Идавсил [аьлайгьи салям] Аллагьнал мадукара увкусса мурхьирая ахъулсса дуркуссар. Яла Аллагьу Тааьланал му Алжаннавагу уккан увну, ахттакьун чак бува куну амру бувссар. Мунихлунур Аллагьнал му чIумал чак ялув бувсса. Чакурдива яла ххирамургу мури. Му бувайма ниттил увсса кьини куна бунагьрая марцI шайссар.

МаркIачIан чак

МаркIачIан чIумал чак ялув баву тIурча, Адам Идавсил [аьлайгьи салям] га мурхьирая ахъулсса дуркуну Алжаннавагу уккан увну махъ шанттуршра шин хьувкун, маркIачIан чIумал Аллагьнайн тавба дурну, кIура авну, шанна ракааьт чаклил дурссар. Аллагьналгу мунал тавба кьамул дурссар. Мунияту, Аллагьнал му чIумал шанна ракааьт чаклил дуван ялув дурссар. Му чакгу бувну, Аллагьнайн дуаьгу дурманал дуаьлухьхьун жаваб дулайссар.

ХъатIан чак

ХъатIан чак ялув баву тIурча, Кьиямасса кьинилул цIаншиврухагу, гьаттал цIаншиврухагу му хъатIан чаклил чIун лащан дурну, Аллагьу Тааьланал му чIумал хъатIан чак баву ялув бувссар, цIансса гьаттавугу, цIансса Кьиямасса кьинигу, СиратIрал ламуйгу нурну, чирахъну бикIан. Му чак жяматрай буван мизитравун лагайма дужжагьрал цIараща ххассал увантIиссар.

КIюрххил чак

КIюрххил чак ялув баву тIурча, гьарца кьини баргъ буккайссар щяйтIаннул бакIрайсса кIивагу кьурттарал дянивух. Му чIумал чапуртуврал бургъийн суждагу бувайссар. Мунихлуну, Аллагьнал баргъ букканнин хьхьичI чак баву ялув бувссар. МукьцIалва гьантлий кIюрххил чак жяматрай бувсса бусурманчу, Аллагьнал ххассал увайссар мунафикьшивруятугу ва дужжагьраягу.

Макьала сакин дурссар «НасихIатуль-аьвам» луттирайн чул бивщуну.