Никогда не поздно начать делать намаз и читать Коран

Кьуръан буккаву

Кьуръан буккаву МухIаммад Идавсил [саллаллагьу аьлайгьи ва саллям] суннат бушиву, чири хъунмасса даву душиву. Гьарца бусурманчунал хIарачат буллан аьркинссар аьраб мазрай Кьуръан буккин лахьхьин.

Жулва инсантал, хаснува хъунив хьуми, чIявуну тIун бикIай «на му оьрмулува увккунна», «чIун дакъар», «ттун чIивину унува нитти-буттал лахьхьин къабувуна», «нач хъанай дур» тIий… вай гьарзад укунмасса учаймахъру бушиву чIалай бур.

Идавсил [саллаллагьу аьлайгьи ва саллям] увкуссар:

«Зу элму-кIулшилучIан кIункIу тIути чIиви оьрчIал кIанттува байбивхьуну гьаттавун бухханнин».

Буккаврил ххирашивруя

Кьуръан буккаврил ххирашивруя чIявусса хIадисирттаву бувсун буссар:

«Кьуръан буккин лахьхьияра, цанчирча, Кьиямасса Кьини мунил шафааьт буллантIиссар цуппа бувккуманаха».

Цамур хIадисраву увкуну бур:

«КIия инсаннаха дакI мяшну бикIан бучIиссар – Кьуръангу лавхьхьуну дяхтта ва хьхьувай га буккайманаха ва хьхьувай ва дяхтта Аллагьнал ххуллий хъус харж дуллалисса аваданчунаха».

Ялагу увкуну бур:

«Кьуръан кIулма уссар малаиктуращал ца ххуттаву. ЗахIматну бунува, хIарачат буллай Кьуръан буккин лахьлахьиманан кIилийнусса чири буссар».

Му бакъассагу, аьраб мазрай Кьуръан буккин кIулсса бусурманчунаща хьунтIиссар тIайлану дуаьртту, азкарду, тасбихIру дуккин, МухIаммад Идавсил [саллаллагьу аьлайгьи ва саллям] дуклай ивкIсса куццуй.

Нач машари

ЧIявуми бикIай нач дуллай, гъалатI лякъирча, цайва хъянссар тIий. Микку нач дуллансса цичIав савав дакъассар, цанчирча, жува аьраб бакъару, жува аьжамру. Мунияту, жулва бакъасса мазрай гьарца хIарп тIайлану зумух ласун бигьану къабикIайссар. Нач дуллай ягу дакI хъун хъанай Кьуръан лахьхьаву кьадитан къабучIиссар.