Гьарзар дакlнил азарду
Стихи на лакском языке, стих про Эго
Муса Сулейманов
Стихотворение на лакском языке
Гьарзар дакIнил азарду,
Напсилул чапалшиву,
Миннул даруртту чанни
Мий букангу захIматри.
Къашаваймий гьарзари
Хъин бан хIакинтал чанни,
Духтурнал тIимур байми
Оьнува чансса бури.
ДакI хъун дурну заназалт
КIулливав ча бувкссарив,
Ци лавсун занай буну
Дури дакIнил хъуншиву.
Аллагьнал увкуну бур
ТанмихI хъунмасса буссар
ДакI хъун дурну занайма
Цана хъинну къаччиссар.
ДакIмяшъшиву мадара
Аллагьнал чивчумуний,
Гьарца ляхъан увманал
Цалва кьисмат буссарча.
Аллагьнал буллу неъмат
Винма къабуллухьурча,
Бахилшиву кьарити
Заннал буллу неъматрайн.
Вил уссин ца тIитIирча
Винна цамур тIитIайссар,
Гьунттий ялун бучIанмур
Заннан бакъа къакIулссар.
Хъусливу бакъассари
Ва дунияллул неъмат,
Неъматшиву дикIайссар
ДакIниву Аллагь унан.
Оьма ва сси бизайма
Инсантуран къаххирар,
Му хасият ду инсан
Идавсил e ххуллий акъар.
Идавс e ивкIссар кIукIлусса
Инсантуран ххирасса,
Цанма оьбала бувнан
Хьинбала буллан ччисса.
КIукIлуну зума ахъу
Инсантурахь гьармудан,
Хъинбала бувну икIу
НахIусса махъ увкуну.
Идавсил e кусса куццуй
Ина къуццу буварча,
ТIитIинтIиссар Аллагьнал
Вин Алжуннул къапурду.
Автор: Сулейманов Муса
