Укрепляй свой Иман

Цаппара суннарду буван захIматнугу, миннул чири ва барачат хъинну хъунмассар. Му иш кIулсса бусурманчунал хIарачат бувантIиссар миннуй хъинну бажар буван.

Бусанну цаппара суннардая.

Тагьажуд чак баву

Цаппараннан кIюрххил чаклийн чIумуй шания бизан захIматну бикIай. Тагьажуд чак буван хъиннува захIматссар, муниятур мунил чиригу хъунмасса.

Ратибат-чакру баву

Ххювагу чаклил хьхьичI-махъ ссуннатсса ратибат-чакру бувну хъинссар:

• 2 ракааьт кIюрххил чаклил хьхьичI;
• 4 ракьааьт ахттайн чаклил хьхьичI ва 4 ракааьт хъирив;
• 4 ракааьт ахттакьун чаклил хьхьичI;
• 2 ракаьат маркIачIан чаклил хъирив;
• 2 ракааьт хъатIан чаклил хъирив.

Итни ва хамис кьини зума дугьаву

МухIаммад Идавсил [саллаллагьу аьлайгьи ва саллям] хасну вай кьинирдай зума дугьайсса диркIссар.

Ганал учайсса бивкIссар: «Инсантурал аьмаллу (тIуллу) Аллагьнал хьхьичI бацIан бувайссар итни кьини ва хамис кьини. Ттун ччива ттулами аьмаллу Аллагьнал хьхьичI бацIан бувну нава зума дургьусса чIумал».

Нюжмар кьини «Аль-Кагьф» тIисса сура буккаву

«Аль-Кагьф» тIисса Кьуръандалул 18-мур суралул даражартту хъинну чIявуссар.

Чаклин биссайхту кIира суннатсса ракааьт даву

Ца кьини кIюрххицIунмай Идавсил [саллаллагьу аьлайгьи ва саллям] гьан бувну бур Билаллуйн [разияллагьу аьнгьу] оьвчин. УчIайхту цIувххуну бур:

«Билал, ина Алжаннаву ттуяр хьхьичIун уккан ссал увра? На гивун та уххарчагу, ттун гиву ина лякъара». Билаллул [разияллагьу аьнгьу] бувсун бур: «На акбар увкутари кIира ссуннатсса ракааьт дувара. Ялагу чаклин иссаву зия хьувтари гацIана цIуницIа чаклингу ивссуну, Аллагьнахлуну кIира ракааьт дувара». МухIаммад Идавсил [саллаллагьу аьлайгьи ва саллям] увкуну бур: «Ми кIивагу ишри сававну хьусса».