Имам Лакского района Мухаммад Майранов

Ассаламу аьлайкум, лакрал жямат!

Рамазан зурул ахир гъан хъанай дур. Лавгсса гьантрай жула эбадатраву чIярусса гъалатIру, диялдакъашивуртту хьунни, гай хъирив лаян дувангу утти къахьунссар. Амма жула хьхьичI ттигу бур мубараксса гьантри, ин шаа Аллагь.

Имам Бухарил ва Имам Муслимул луттирдавусса щак бакъасса (балжисса) хIадисраву увкуну бур:

«Заннайн умуд бивхьуну, Лайлатул-кьадрилул хьхьу эбадат дуллай уттара дурманал бувсса циняв бунагьру Аллагь Тааьланал багъишла битантIиссар».

Кьуръандалуву му хьхьунин хас бувсса щаллусса сура бур. Ганиву бувсун бур Лайлатул-кьадри азарва зуруяр ххуйсса, ххирасса хьхьу душиву. Му хьхьу мяйжанну та дикIантIиссарив кIулну бакъар, му жуятува кьюлтI бувну бур.

Цири бантIисса? Балики гьархьхьуну дикIан тIий, гьарца хьхьуну эбадат дулларча, МухIаммад Идавсил [саллаллагьу аьлейгьи ва саллям] бувсъсса чири жунма биянтIиссар.

ХIурмат бусса уссурвал ва ссурвал!

Вай мубараксса гьантри оьнма чIарах буккан мабитари: дуаьрду дуллали, къабувну ливчIсса чакру хъирив лахъан буллали, Кьуръан, зикри, ссалаватру ккалакки. Жула гъумучиял мизитрал къапурду мудангу тIивтIуссар, бухьхьияра шивун!

Жула цIа дурксса Хъун-мизит буцIин бувара, эбадатру дуллай уттава бувара. Вай махъва-махъсса гьантлий Гъази-Гъумучиял мизит халкьуннал бувцIуну ччива, ин шаа Аллагь! Жула Лакку билаятраха ва циняв бусурманнаха дуаь дуллангу хъама мабитари, амин!