Использование сивака и его польза

Сивак дуккаву

Чаклийн иссайни, чак байни ягу кьацI баххана хьуну, тIааьн бакъа хьусса чIумал, ягу шания ивзсса чIумал, ягу тIааьн дакъасса зад дуркуну кьацI баххана хьусса чIумал сивак дуккаву хъинссар, ссуннатссар. Идавсилгу [саллаллагьу алейгьи ва саллям] увкуну бур «Чаклин биссаву диндалул бутIар. Сивак дуккаву чаклин биссаврил бутIар. Умматиннан захIмат къашайссания гьарца чак бувайни сивак дуккира куну амру бавияв» - куну. Сивак дурккуну бувсса чаклил чиригу, даражагу лахъссар.

Расуллуллагь [саллаллагьу алейгьи ва саллям]  ссавруннайн лавхъун Алжаннавун увххукун, мивусса хIурулъэнтурал увкуссар: «Я МухIаммад! Ина вилва умматиннахь сивак дулуккира уча. Миннал сивак дурктари жул ххуйшиву гьарза шай» - куну. Му дуккавриву хъунмасса чири буссар, чIявусса даруртту буссар, ххюцIалва пайда буссар. КьацI марцI байссар, Аллагь рязи шайссар, малаиктал ххари шайссар, янил чани  ьарза шайссар, балгъам цIуцIаврин хъинссар, хIифз зиядасса шайссар, ккарччив кIяла шайссар, синтту цIакь шайссар, дукра бигьану лялияйссар, цайми-цайми пайдарттугу чIявуссар. ХIатта Идавсил [саллаллагьу алейгьи ва саллям] аьсхIабтурал сивак мудан цащалла дикIайва тIар, Аллагь кIицI лагайний, Куръан буккайний, дукра дуркукун дуккаван.

Му сивакгу яла хъинмур Аракь тIисса мурхьирая кьуркьумурди, яла цамур мурхьирая кьуркьумурди, цурдагу аьнтуксса лахъисса дикIаву хъинссар. Дуккайнигу урчIамур битIя кIисса лув бивхьуну, хъун кIиссурал бакI тамур бакIрачIа дирхьуну дукканссар ккарччайх уттайннай, урчIамур чулуха айивхьуну. Му сивак дакъахьурчан цамур ххарттасса, кьянкьасса, кьацI марцI байсса зад дукканссар, янналул ссимиялттул мурцIу-зума ци-дунугу. ХIатта кIисса буккаврил гьашиву дайссар тIийгума бур, дурагу къадурккун икIаяр. Цурдагу щяивкIун дуккаву хъинссар. Амма зума дургьусса адиминал ахттая махъ къадуккаву хъинссар тIий бур. Сивак дуккайнигу «Аллагьумма барик лана фигьи я архIама ррахIимин» учинссар.

«ГьунчIукьатIан»