Добро пожаловать месяц Рамадан

Мажлис тlитlлай Ккуллал райондалул имам Мухlаммад-Маннар Бариевлул бувсуна Рамазан зурул даражалия. Дакlнин бувтуна зума дугьаврил мурад ккаши-мякьлищал архlал чурххал базурдугу гьарца лайкь бакъамуния бурувччуну бугьаву бушиву.

Диндалул аьдатрайн бувну, мажлис байбивхьуна Заннал калам буккаврийну. Мубараксса аятру ккалаккиману ия Чlарадиял райондалиясса хlафиз (щалва Кьуран дакlних кlулма) Мухlаммад Шафи.

Мажлис бачин бувна диндалул зумувсса мажлисру сакин бувайсса «Аманат» холдинграл каялувчи Ахмад ХIасанхановлул. Клубравун бавтIцириннан ванал насихlат бувна диндалул элму мюрщинияцlа лахьлан аьркиншиву.

Хъирив вяъза-насихlат бусан увккуна Разакьов Аьлиасхlаб – зунтталмур округрайсса Муфтиятрал жаваблувсса вакил. Дурккучунал насихlат бувна Рамазан лайкьну, Идавсил ﷺ лахьхьин бувсса куццуй хьунабакьияра: зума дугьлай, хъинсса давуртту дуллай ва бунагьмуния арх хъанай, куну. КIицI лавгуна Исламраву лахъсса кьимат буллуну бушиву цачIуншиврун, уссушиврун. Дакlнин бувтуна ва аьрщарай куннан ку Аллагьнахлуну ххирану бивкlсса инсантал Кьиямасса кьини ляличlину лахъсса даражалий бикlантlишиву, сайки идавстурал ва шагьидтурал хlайп учинтlисса.

Цlумадиял райондалул имамтурал каялувчи Мухlаммад Мукьушдибировлул бувсуна чак баву хъанахъишиву диндалул ца агьамсса ттарцl. Му ттарцl дагьан диртманал цала дин лекьан дуллалиссар, увкуна. Дакlнин дуртуна зума дугьайни дувайсса нанижатрал шартlругу, дугьаврил низамгу.

Лакку ва оьрус мазурдийса Рамазан зурун хас дурсса назмурду дурккуна Ккуллал райондалул мадрасалийн дарсирайн бучIайсса душварал.

Лакрал райондалул имам Мухlаммад Майрановлул кlицl лавгуна ялун нанисса никиран лайкьсса тарбия дулаврил агьамшиву ва диндалия бусласисса мажлисирттайн занан аьркиншиву, занансса каши-сант душиврухлугу Заннайн щукругу бикIавугу чара бакъашиву.

Райондалул администрациялул чулуха жамят барча бувна бакlчинал кумагчи Абусупиян Аьбдуллаевлул. Райондалул имам Мухlаммад-Маннар Бариевлул ванайхчIин Шамил Рамазановлун тапшур дуруна дакlний личlансса бахшиш ва барчаллагьрал чагъар.

Мажлисрайн бавтlминнал дянив Рамазан зузурясса суаллал викторина дурну, пишкаш дуруна дакlний личlансса бахишру.

Мукунма, кlунтти бивчуну пишкаш дуруна кьиматсса бахшишру: лисапlитl, телевизор ва цамур ичlаллил къай.

Ккуллал райондалий "Ас-салам" кказит чивчуминнал дянив кlунтти бивчуну, чlивимур Хlаж (Оьмра) бувансса путёвка пишкаш дуруна.  Мугу дурххуна Хъусращиял шяраватусса Рамазанова Людмилал.

Лях-карах бюххансса чlуний мавлудру ва нашидру ккалай бия Мухlаммад Гъазимухlаммадов ва Рамазан Мажидов.

Ахирданий циняв бусурманнаха, хаснува хасъсса аьралий операциялуву гьуртту хъанахъисса жулва жагьилтураха ва зулмулувусса Палестиннаха дуаьгу дурну мажлис лавкьуна.