Нюжмар кьинилул кьимат

Самый лучший день недели - пятница

Нюжмар кьинилул кьимат
Самый лучший день недели

Нюжмар кьини

Пятничный день

Ххуйну пикри буварча, жунма бувчIлай бур цIана жува яхъанахъисса чIун цукун анаварну наниссарив. Шин барз кунна, барз кьини кунна лерххун най дур. Амма жунма хIисав хъанай бакъар жува гьарца кьини цара ца даву дуллай, цинявппа гьантри кунниха ку лавхьхьуну най бушиву. Мунияту, жунма хъама битан къабучIиссар душиву цаппара ляличIисса чIунну – шинаву барзру, зурдардиву кьинирду, гьантраву ссятру. Мигу хъанахъиссар жува АллагьначIан гъан шайсса, барачатсса, буллугъшиву дирхьусса манзиллу. Миннувасса цаппара Аллагьнал кьюлтI бувссар, жува Аллагьнал рязишиву тIалав дуллай хъиннува хIарачат буваншиврул.

Цинявппагу мусульманнан нюжмар кьини байранну хъанахъиссар. Ца хIадисраву увкуну бур: «Ххуллун кьини – жугьутIиян, алхIат кьини – хачпараснан, нюжмар кьини мусульманнан». Му кьини жуйнма хъинбаларду, хъиншивуртту ликкайсса кьинири. Цамур хIадисрайн бувну, нюжмар кьинилул кьимат лахъссар Зумаритавал, Кьурбан-байрамрал ва Аьшурдул кьинирдаяр, так Аьрафатрал кьини личIаннин.

Нюжмар кьини Аллагьнал ляхъан увссар Адам Идавс [аьлайгьи салям], нюжмар кьини му ликкан увссар аьрщарайн, ва дунияллия накьлугу хьуссар нюжмар кьини. Нюжмар кьинилуву буссар ца чIумул манзил – ссят, му чIумал Аллагьу Тааьланал жура дурсса дуаьртту кьамул дувайссар. Амма Аллагьнал му чIун цумур ссятраву дуссарив инсаннан кIул дурну дакъар, щала кьини эбадат дуллай бикIаншиврул.

МухIаммад Идавс [саллаллагьу алейгьи ва саллям] увсса хьхьунил ва Рамазан зурувусса Лайлатул-кьадрилул хьхьунил хъирив яла ххуймур хьхьу хъанахъиссар нюжмар хьхьу. Малаиктурал нюжмар кьинилийн учайсса бур буллугъшиврул, аваданлугърал кьини, куну. Му кьини Аллагьнал Цала лагъартуннайн хIисав дакъасса неъматру ва цIими ликкан бувайссар.

Жува чIявуну къулагъас къадурну кьадитайсса нюжмар хьхьу ва нюжмар кьини цукунни гьан дуван аьркинсса?

Цалчин, къулагъас дуван ччива чак буллай байбишин ччиминнал: бюхъай кьинилун ххюва чак баву зун чIалай дикIан хъуннасса жаваблувшиву ва гьаз дуван къашайсса гьиву кунна. Нюжмар кьини ва нюжмар чак хьун бюхъайссар Аллагьнайн мютIийну оьрму бачин буллай байбишаврил сававну. Му кьини эбадат дуллай гьан дурсса гьарца ссят, минутI ягу лахIза хьун бюхъайссар цIусса, талихIсса, рувхIанийсса оьрмулул дайдихьуну.

Му чулинмай цалчинсса ша буварча, чара бакъа Аллагьнал кабакьинтIиссар, кумаг бувантIиссар.

Чак буллалиминнаву чансса бакъар нюжмар кьинул барачатрайну байбивхьусса. Цанчирча, му чIумал циняв мусульман, мизитравун бувкIмий архIал чак буллай, дуаь дуллай, Аллагьнайн леххаву тIий, бунагьру багъишла битаву, цIими бишаву чIа тIий бикIайнутIий. Му чIумал чIалан бикIайссар инава мяйжаннугу МухIаммад Идавсил [саллаллагьу алейгьи ва саллям] умматравасса ушиву, циняв мусульман ца кулпат бушиву. Нюжмар чаклийн бувкIсса ттуршахъул, азарахъул инсантураву ца салихIсса, Аллагьнан ххирасса валий ухьурча, мунал барачатрайну Аллагьнал жула оьрмугу ххуймур чулинмай кIура баян буван бюхъайссар. Ягу жунма мизитраву бавсса вяъза, Кьуръанналул аят ягу хIадис дакIнивун бювххун, жува тIайла бацIан бюхъайссару. Нюжмар кьини мизитраву, жяматраву гьан дурсса гьарца минутI лащан дуван бучIир багьа бищун къашайсса ттеркьукьилуха. Чансса хIарачат буварча, му ттеркьукьи жухьхьуннагу дириянтIиссар. Мунияту, чак буллай айишин ччиманалгу лахъи лаган къабувну, махънин къабувтун, анаварну айишин аьркинссар, циняр дуаьртту лахьхьиннин, давурттая илкинсса чIун лякъиннин къаялугьлай. Так дакIниву марцIсса ният дурну, Аллагь рязи увансса пикри бушиву гьассар. ХIакьину ягу гьунттий нюжмар кьини духьурча, бачияра му давлат итакъабавкьуну, барачатсса кьинилул неъматругу лавсун, Заннайн мютIийсса цIусса оьрму байбишиннуча!

Салават дутияра

Ца хIадисраву Идавсил [саллаллагьу алейгьи ва саллям] увкуну бур: «Кьинирдава яла даража лаваймур – нюжмар кьинири, му кьини зу чIяруну салават дутияра», – куну. Яла кутIамур ва жунна ххуйну кIулмур салават дур «Аллагьумма салли аьла МухIаммадин ва аьла али МухIаммадин ва саллим». Ца салават дуртсса инсаннайн Аллагьу Тааьланал ацIра салават дутайссар, ацIва чири чичайссар, ацIва бунагь багъишла битайссар, ацIва даражалул лавай увайссар.

Аллагьнал жунма кумаг буваннав буллусса неъматирттал кьадру кIулну бикIан, Аллагь рязисса куццуй эбадат дуллан, нюжмар кьини бусравну гьан дуллан, салават дутаву чIяру дуван.